Numbers 31

Midian-te tunga Phulakna

1TOPA in Moses tungah, 2“Israel-te phu Midian-te tungah la in. Tua khit ciangin na mipihte kiangah hong kipaipih pan ding hi,” a ci hi. ^a

3 Tua ciangin Moses in mite kiangah, “Midian-te sima TOPA phulakna a sem dingin mite pawlkhat galhiam tawh kithawisak un; 4Israel beh khat ciangin pasal tulkhat ta kuansak un,” a ci hi. 5Tua ciangin beh khat panin tulkhat ta a kuan galhiam tawi mi tulsawm le nih Israel bawng’te panin a kuansak ciat uh hi. 6Moses in beh khatah mi tulkhat galsim dingin sawla, Eleazar tapa siampi Phinehas, biakbuka nate le thukoh nadingin pengkulte kengsakin amaute a zuisak hi.

7 TOPA in Moses a thupiak bangin amaute in Midian-te sim uh a mi khempeuh a that uh hi. 8A mi thahte uh lakah Midian kumpi ngate ahi: Evi, Rekem, Zur, Hur le Reba zong kihel hi. Amaute in Beor tapa Balaam zong a that uh hi. 9Israel-te in Midian-te’ numei le naupangte le Midian-te’ bawnghon, tuuhonte le a na khempeuh uh galvanmat bangin a man uh hi. 10Midian-te tenna khuapite le a giahbuk khempeuh uh a haltumsak uh hi. 11Van khempeuh laksak uh a, mite le ganhingte susia-in 12Jericho b pan Jordan gun kantanna Moab zanglei-a giahphual - Israel mihonte kikhopna-a Moses le siampi Eleazar kiangah a galmatte uh, a van matte uh le a van laksakte uh a tun uh hi. ^b

13 Amaute dawn dingin Moses, siampi Eleazar le mihonpi makaite giahphual pua-ah a paikhia uh hi. 14Galkapte a makaih tul tampi ukte le za tampi ukte - giah phual-a hong ciahte tungah Moses a heh hi. ^c

15 Amaute kiangah, “Numeite hingkhawi na hi uh hiam? 16TOPA tung pana Israel-te a kiheikhiasak, Peor ah TOPA mite tunga pulpi a tungsak Balaam hilhna a mang amaute hi lo uh ahi hiam? 17Tu-in pasalno teng that un. Tuateh pasal tawh a lumkhawmsa numei peuhmah that unla, 18ahi hangin pasal tawh a lumkhawm nai lo numeino peuhmah nomau adingin suaktasak un.

19 “Mi khatpeuh a that ahikeh a kithatsa a lawngkhate peuhmah ni sagih sung giahphual pualam ah na om pelmawh ding uh hi. A ni thumna ni le a ni sagihna ni-in no le na galmatte uh na kisiansuah ding uh hi. 20Savun, keelmul ahikeh singa kibawl nate le puansilh khempeuh na siansuah ding uh hi,” a ci hi. ^d

21 Tua ciangin gal sunga kuan galkapte kiangah siampi Eleazar in, “TOPA in Moses a piak thukham deihna hih ahi hi: 22Kham, ngun, sumngo, sik, langva, hak 23le mei a do zo na peuhmah mei-in kihal pelmawh dinga tua ciangin a siang suak ding hi. Ahi hangin sianna tui ah zong kisawp pelmawh ding hi. Tuateh mei a do zo lo peuhmah tua tui sungah kidiah ding hi. 24A ni sagihna ni-in na puante uh na sawp ding uh a na siang ding uh hi. Tua khit ciangin giahbuk sungah na tum thei pan ding uh hi,” a ci hi. ^e

Vanmatte Hawm

25 TOPA in Moses kiangah 26“Nang le siampi Eleazar le mihonte innkuan lutangte khempeuh in a kiman mihing le ganhingte sim un. 27Gal sunga kuan galkapte le mihonpite a vanmatte uh hawmsak un. 28Galsim a kuan galkapte aa panin mihingte, bawnghonte, laate, tuuhonte ahikeh keelte, zanga ciangin khat TOPA siahkaih dingin sehkhia un. 29Amau ngahzah lang sung panin hih siahkaih la unla, TOPA tanh dingin siampi Eleazar tungah pia un. 30Israel-te ngah alang sung panin mihingte, bawnghonte, laate, tuuhonte, keelte ahikeh ganhing dangte sawmnga ciangin khat ciat tengkhia inla TOPA’ biakbuk kem dinga thunei Levi-te tungah tuate pia in,” a ci hi. 31Tua ciangin Moses le siampi Eleazar in, TOPA in Moses a thupiak bangin a sem uh hi. ^f

32 Van kimante sunga a omlai galkapte lakte tuu 675,000 33bawng 72,000, 34laa 61,000, 35le pasal tawh a lumkhawm nai lo numeino 32,000 ahi hi.

36 Gal sima kuante ngah a langte:

tuu 337,500 37tuate lakah TOPA ading siahkaih 675;
38 bawng 36,000 tuate lakah TOPA ading siahkaih 72;
39 laa 30,500 tuate lakah TOPA ading siahkaih 61;
40 mihing 16,000 tuate lakah TOPA ading siahkaih 32, ahi hi.

41 TOPA in Moses a thupiak bangin Moses in TOPA tanh dingin siampi Eleazar tungah siahkaih a pia hi.

42 Galsimna a kuante ngahzah a lang mah Israel-te adingin Moses in sehkhia a - 43mihonpite ngah a lang in: tuu 337,500, 44bawng 36,000, 45laa 30,500, 46le mihing 16,000 ahi hi. 47Israel-te aa a lang panin mihing le ganhing sawmnga ciangin khatta TOPA thupiak bangin Moses in tengkhia a, TOPA biakbuk kepna-a tavuan nei Levi-te tungah a pia hi.

48 Tua ciangin galkap hon tampi tungah a ukte tul tampi ukte - za tampi ukte - Moses kiangah pai uh a, 49ama tungah, “Nangma nasem kote in ka ukna nuai-ua om galkapte ka sim khin uh a, khat beek a kikhahsuah kei hi. 50Tuateh kote in mawhna khuh nadingin TOPA biakna-in kham-a kibawl banbuh le taute, seal zungbuhte, bilbahte, khite ka muh ciatciat uh TOPA mai-ah thoihdamna dingin ka puak uh hi,” a ci uh hi. ^g

51 Moses le siampi Eleazar in amaute tung panin kham-a kibawl na khempeuh a sang uh hi. 52A tul tampi ukte le a za tampi ukte in Moses le Eleazar tungah TOPA adingin letsong a, a piak khempeuh uh kham shekel a 16,750 a gik hi. 53Galkapte in amau tanh ciat a la uh hi. 54Moses le siampi Eleazar in a tul tampi ukte le a za tampi ukte tung panin khamte sang uh a, Israel-te phawk tawntung nadingin Kikhopna Puanbuka TOPA mai-ah a puak uh hi. ^h